లలితా అపరాధ క్షమాపణ స్తోత్రం

కంజమనోహరపాదచలన్మణినూపురహంసవిరాజితే
కంజభవాదిసురౌఘపరిష్టుతలోకవిసృత్వరవైభవే.
మంజులవాఙ్మయనిర్జితకీరకులేచలరాజసుకన్యకే
పాలయ హే లలితాపరమేశ్వరి మామపరాధినమంబికే.
ఏణధరోజ్వలఫాలతలోల్లసదైణమదాంకసమన్వితే
శోణపరాగవిచిత్రితకందుకసుందరసుస్తనశోభితే.
నీలపయోధరకాలసుకుంతలనిర్జితభృంగకదంబకే
పాలయ హే లలితాపరమేశ్వరి మామపరాధినమంబికే.
ఈతివినాశిని భీతినివారిణి దానవహంత్రి దయాపరే
శీతకరాంకితరత్నవిభూషితహేమకిరీటసమన్వితే.
దీప్తతరాయుధభండమహాసురగర్వనిహంత్రి పురాంబికే
పాలయ హే లలితాపరమేశ్వరి మామపరాధినమంబికే.
లబ్ధవరేణ జగత్రయమోహనదక్షలతాంతమహేషుణా
లబ్ధమనోహరసాలవిషణ్ణసుదేహభువా పరిపూజితే.
లంఘితశాసనదానవనాశనదక్షమహాయుధరాజితే
పాలయ హే లలితాపరమేశ్వరి మామపరాధినమంబికే.
హ్రీంపదభూషితపంచదశాక్షరషోడశవర్ణసుదేవతే
హ్రీమతిహాదిహామనుమందిరరత్నవినిర్మితదీపికే.
హస్తివరాననదర్శితయుద్ధసమాదరసాహసతోషితే
పాలయ హే లలితాపరమేశ్వరి మామపరాధినమంబికే.
హస్తలసన్నవపుష్పసరేక్షుశరాసనపాశమహాంకుశే
హర్యజశంభుమహేశ్వరపాదచతుష్టయమంచనివాసిని.
హంసపదార్థమహేశ్వరి యోగిసమూహసమాదృతవైభవే
పాలయ హే లలితాపరమేశ్వరి మామపరాధినమంబికే.
సర్వజగత్కరణావననాశనకర్త్రి కపాలిమనోహరే
స్వచ్ఛమృణాలమరాలతుషారసమానసుహారవిభూషితే.
సజ్జనచిత్తవిహారిణి శంకరి దుర్జననాశనతత్పరే
పాలయ హే లలితాపరమేశ్వరి మామపరాధినమంబికే.
కంజదలాక్షి నిరంజని కుంజరగామిని మంజులభాషితే
కుంకుమపంకవిలేపనశోభితదేహలతే త్రిపురేశ్వరి.
దివ్యమతంగసుతాధృతరాజ్యభరే కరుణారసవారిధే
పాలయ హే లలితాపరమేశ్వరి మామపరాధినమంబికే.
హల్లకచంపకపంకజకేతకపుష్పసుగంధితకుంతలే
హాటకభూధరశృంగవినిర్మితసుందరమందిరవాసిని.
హస్తిముఖాంబవరాహముఖీధృతసైన్యభరే గిరికన్యకే
పాలయ హే లలితాపరమేశ్వరి మామపరాధినమంబికే.
లక్ష్మణసోదరసాదరపూజితపాదయుగే వరదే శివే
లోహమయాదిబహూన్నతసాలనిషణ్ణబుధేశ్వరసంయుతే.
లోలమదాలసలోచననిర్జితనీలసరోజసుమాలికే
పాలయ హే లలితాపరమేశ్వరి మామపరాధినమంబికే.
హ్రీమితిమంత్రమహాజపసుస్థిరసాధకమానసహంసికే
హ్రీంపదశీతకరాననశోభితహేమలతే వసుభాస్వరే.
హార్దతమోగుణనాశిని పాశవిమోచని మోక్షసుఖప్రదే
పాలయ హే లలితాపరమేశ్వరి మామపరాధినమంబికే.
సచ్చిదభేదసుఖామృతవర్షిణి తత్త్వమసీతి సదాదృతే
సద్గుణశాలిని సాధుసమర్చితపాదయుగే పరశాంబవి.
సర్వజగత్పరిపాలనదీక్షితబాహులతాయుగశోభితే
పాలయ హే లలితాపరమేశ్వరి మామపరాధినమంబికే.
కంబుగలే వరకుందరదే రసరంజితపాదసరోరుహే
కామమహేశ్వరకామిని కోమలకోకిలభాషిణి భైరవి.
చింతితసర్వమనోహరపూరణకల్పలతే కరుణార్ణవే
పాలయ హే లలితాపరమేశ్వరి మామపరాధినమంబికే.
లస్తకశోభికరోజ్వలకంకణకాంతిసుదీపితదిఙ్ముఖే
శస్తతరత్రిదశాలయకార్యసమాదృతదివ్యతనుజ్వలే.
కశ్చతురోభువి దేవిపురేశి భవాని తవ స్తవనే భవేత్
పాలయ హే లలితాపరమేశ్వరి మామపరాధినమంబికే.
హ్రీంపదలాంచితమంత్రపయోదధిమంథనజాతపరామృతే
హవ్యవహానిలభూయజమానకఖేందుదివాకరరూపిణి.
హర్యజరుద్రమహేశ్వరసంస్తుతవైభవశాలిని సిద్ధిదే
పాలయ హే లలితాపరమేశ్వరి మామపరాధినమంబికే.
శ్రీపురవాసిని హస్తలసద్వరచామరవాక్కమలానుతే
శ్రీగుహపూర్వభవార్జితపుణ్యఫలే భవమత్తవిలాసిని.
శ్రీవశినీవిమలాదిసదానతపాదచలన్మణినూపురే
పాలయ హే లలితాపరమేశ్వరి మామపరాధినమంబికే.