ಯಮುನಾ ಅಮೃತ ಲಹರೀ ಸ್ತೋತ್ರ
ಮಾತಃ ಪಾತಕಪಾತಕಾರಿಣಿ ತವ ಪ್ರಾತಃ ಪ್ರಯಾತಸ್ತಟಂ
ಯಃ ಕಾಲಿಂದಿ ಮಹೇಂದ್ರನೀಲಪಟಲಸ್ನಿಗ್ಧಾಂ ತನುಂ ವೀಕ್ಷತೇ.
ತಸ್ಯಾರೋಹತಿ ಕಿಂ ನ ಧನ್ಯಜನುಷಃ ಸ್ವಾಂತಂ ನಿತಾಂತೋಲ್ಲಸ-
ನ್ನೀಲಾಂಭೋಧರವೃಂದವಂದಿತರುಚಿರ್ದೇವೋ ರಮಾವಲ್ಲಭಃ.
ನಿತ್ಯಂ ಪಾತಕಭಂಗಮಂಗಲಜುಷಾಂ ಶ್ರೀಕಂಠಕಂಠತ್ವಿಷಾಂ
ತೋಯಾನಾಂ ಯಮುನೇ ತವ ಸ್ತವವಿಧೌ ಕೋ ಯಾತಿ ವಾಚಾಲತಾಂ.
ಯೇಷು ದ್ರಾಗ್ವಿನಿಮಜ್ಜ್ಯ ಸಜ್ಜತಿತರಾಂ ರಂಭಾಕರಾಂಭೋರುಹ-
ಸ್ಫೂರ್ಜಚ್ಚಾಮರವೀಜಿತಾಮರಪದಂ ಜೇತುಂ ವರಾಕೋ ನರಃ.
ದಾನಾಂಧೀಕೃತಗಂಧಸಿಂಧುರಘಟಾಗಂಡಪ್ರಣಾಲೀಮಿಲ-
ದ್ಭೃಂಗಾಲೀಮುಖರೀಕೃತಾಯ ನೃಪತಿದ್ವಾರಾಯ ಬದ್ಧೋಽಞ್ಜಲಿಃ.
ತ್ವತ್ಕೂಲೇ ಫಲಮೂಲಶಾಲಿನಿ ಮಮ ಶ್ಲಾಘ್ಯಾಮುರೀಕುರ್ವತೋ
ವೃತ್ತಿಂ ಹಂತ ಮುನೇಃ ಪ್ರಯಾಂತು ಯಮುನೇ ವೀತಜ್ವರಾ ವಾಸರಾಃ.
ಅಂತರ್ಮೌಕ್ತಿಕಪುಂಜಮಂಜಿಮ ಬಹಿಃ ಸ್ನಿಗ್ಧೇಂದ್ರನೀಲಪ್ರಭಂ
ಮಾತರ್ಮೇ ಮುದಮಾತನೋತು ಕರುಣಾವತ್ಯಾ ಭವತ್ಯಾಃ ಪಯಃ.
ಯದ್ರೂಪದ್ವಯಧಾರಣಾದಿವ ನೃಣಾಮಾ ಚೂಡಮಾಮಜ್ಜತಾಂ
ತತ್ಕಾಲಂ ತನುತೇತರಾಂ ಹರಿಹರಾಕಾರಾಮುದಾರಾಂ ತನುಂ.
ತಾವತ್ಪಾಪಕದಂಬಡಂಬರಮಿದಂ ತಾವತ್ಕೃತಾಂತಾದ್ಭಯಂ
ತಾವನ್ಮಾನಸಪದ್ಮಸದ್ಮನಿ ಭವಭ್ರಾಂತೇರ್ಮಹಾನುತ್ಸವಃ.
ಯಾವಲ್ಲೋಚನಯೋಃ ಪ್ರಯಾತಿ ನ ಮನಾಗಂಭೋಜಿನೀಬಂಧುಜೇ
ನೃತ್ಯತ್ತುಂಗತರಂಗಭಂಗಿರುಚಿರೋ ವಾರಾಂ ಪ್ರವಾಹಸ್ತವ.
ಕಾಲಿಂದೀತಿ ಕದಾಪಿ ಕೌತುಕವಶಾತ್ತ್ವನ್ನಾಮವರ್ಣಾನಿಮಾ-
ನ್ವ್ಯಸ್ತಾನಾಲಪತಾಂ ನೃಣಾಂ ಯದಿ ಕರೇ ಖೇಲಂತಿ ಸಂಸಿದ್ಧಯಃ.
ಅಂತರ್ಧ್ವಾಂತಕುಲಾಂತಕಾರಿಣಿ ತವ ಕ್ಷಿಪ್ತಾಭೃತೇ ವಾರಿಣಿ
ಸ್ನಾತಾನಾಂ ಪುನರನ್ವಹಂ ಸ ಮಹಿಮಾ ಕೇನಾಧುನಾ ವರ್ಣ್ಯತೇ.
ಸ್ವರ್ಣಸ್ತೇಯಪರಾನಪೇಯರಸಿಕಾನ್ಪಾಂಥಃಕಣಾಸ್ತೇ ಯದಿ
ಬ್ರಹ್ಮಘ್ನಾನ್ಗುರುತಲ್ಪಗಾನಪಿ ಪರಿತ್ರಾತುಂ ಗೃಹೀತವ್ರತಾಃ.
ಪ್ರಾಯಶ್ಚಿತ್ತಕುಲೈರಲಂ ತದಧುನಾ ಮಾತಃ ಪರೇತಾಧಿಪ-
ಪ್ರೌಢಾಹಂಕೃತಿಹಾರಿಹುಂಕೃತಿಮುಚಾಮಗ್ರೇ ತವ ಸ್ರೋತಸಾಂ.
ಪಾಯಂ ಪಾಯಮಪಾಯಹಾರಿ ಜಾನ್ನಿ ಸ್ವಾದು ತ್ವದೀಯಂ ಪಯೋ
ನಾಯಂ ನಾಯಮನಾಯನೀಮಕೃತಿನಾಂ ಮೂರ್ತಿಂ ದೃಶೋಃ ಕೈಶವೀಂ.
ಸ್ಮಾರಂ ಸ್ಮಾರಮಪಾರಪುಣ್ಯವಿಭವಂ ಕೃಷ್ಣೇತಿ ವರ್ಣದ್ವಯಂ
ಚಾರಂ ಚಾರಮಿತಸ್ತತಸ್ತವ ತಟೇ ಮುಕ್ತೋ ಭವೇಯಂ ಕದಾ.
ಮಾತರ್ವಾರಿಣಿ ಪಾಪಹಾರಿಣಿ ತವ ಪ್ರಾಣಪ್ರಯಾಣೋತ್ಸವಂ
ಸಂಪ್ರಾಪ್ತೇನ ಕೃತಾಂ ನರೇಣ ಸಹತೇಽವಜ್ಞಾಂ ಕೃತಾಂತೋಽಪಿ ಯತ್.
ಯದ್ವಾ ಮಂಡಲಭೇದನಾದುದಯಿನೀಶ್ಚಂಡದ್ಯುತಿರ್ವೇದನಾ-
ಶ್ಚಿತ್ರಂ ತತ್ರ ಕಿಮಪ್ರಮೇಯಮಹಿಮಾ ಪ್ರೇಮಾ ಯದೌತ್ಪತ್ತಿಕಃ.
ಸಂಜ್ಞಾಕಾಂತಸುತೇ ಕೃತಾಂತಭಗಿನಿ ಶ್ರೀಕೃಷ್ಣನಿತ್ಯಪ್ರಿಯೇ
ಪಾಪೋನ್ಮೂಲಿನಿ ಪುಣ್ಯಧಾತ್ರಿ ಯಮುನೇ ಕಾಲಿಂದಿ ತುಭ್ಯಂ ನಮಃ.
ಏವಂ ಸ್ನಾನವಿಧೌ ಪಠಂತಿ ಖಲು ಯೇ ನಿತ್ಯಂ ಗೃಹೀತವ್ರತಾ-
ಸ್ತಾನಾಮಂತ್ರಿತಸಂಖ್ಯಜನ್ಮಜನಿತಂ ಪಾಪಂ ಕ್ಷಣಾದುಜ್ಝತಿ.
Other stotras
