സരസ്വതീ സ്തുതി

യാ കുന്ദേന്ദുതുഷാര- ഹാരധവലാ യാ ശുഭ്രവസ്ത്രാവൃതാ
യാ വീണാവരദണ്ഡ- മണ്ഡിതകരാ യാ ശ്വേതപദ്മാസനാ.
യാ ബ്രഹ്മാച്യുതശങ്കര- പ്രഭൃതിഭിർദേവൈഃ സദാ പൂജിതാ
സാ മാം പാതു സരസ്വതീ ഭഗവതീ നിഃശേഷജാഡ്യാപഹാ.
ദോർഭിര്യുക്താ ചതുർഭിഃ സ്ഫടികമണിമയീമക്ഷമാലാം ദധാനാ
ഹസ്തേനൈകേന പദ്മം സിതമപി ച ശുകം പുസ്തകം ചാപരേണ.
ഭാസാ കുന്ദേന്ദുശംഖ- സ്ഫടികമണിനിഭാ ഭാസമാനാഽസമാനാ
സാ മേ വാഗ്ദേവതേയം നിവസതു വദനേ സർവദാ സുപ്രസന്നാ.
ആശാസു രാശീ ഭവദംഗവല്ലി-
ഭാസേവ ദാസീകൃതദുഗ്ധസിന്ധും.
മന്ദസ്മിതൈർനിന്ദിതശാരദേന്ദും
വന്ദേഽരവിന്ദാസനസുന്ദരി ത്വാം.
ശാരദാ ശാരദാംബോജവദനാ വദനാംബുജേ.
സർവദാ സർവദാഽസ്മാകം സന്നിധിം സന്നിധിം ക്രിയാത്.
സരസ്വതീം ച താം നൗമി വാഗധിഷ്ഠാതൃദേവതാം.
ദേവത്വം പ്രതിപദ്യന്തേ യദനുഗ്രഹതോ ജനാഃ.
പാതു നോ നികഷഗ്രാവാ മതിഹേമ്നഃ സരസ്വതീ.
പ്രാജ്ഞേതരപരിച്ഛേദം വചസൈവ കരോതി യാ.
ശുദ്ധാം ബ്രഹ്മവിചാരസാര- പരമാമാദ്യാം ജഗദ്വ്യാപിനീം
വീണാപുസ്തകധാരിണീമഭയദാം ജാഡ്യാന്ധകാരാപഹാം.
ഹസ്തേ സ്ഫാടികമാലികാം വിദധതീം പദ്മാസനേ സംസ്ഥിതാം
വന്ദേ താം പരമേശ്വരീം ഭഗവതീം ബുദ്ധിപ്രദാം ശാരദാം.
വീണാധരേ വിപുലമംഗലദാനശീലേ
ഭക്താർതിനാശിനി വിരിഞ്ചിഹരീശവന്ദ്യേ.
കീർതിപ്രദേഽഖിലമനോരഥദേ മഹാർഹേ
വിദ്യാപ്രദായിനി സരസ്വതി നൗമി നിത്യം.
ശ്വേതാബ്ജപൂർണ- വിമലാസനസംസ്ഥിതേ ഹേ
ശ്വേതാംബരാവൃത- മനോഹരമഞ്ജുഗാത്രേ.
ഉദ്യന്മനോജ്ഞ- സിതപങ്കജമഞ്ജുലാസ്യേ
വിദ്യാപ്രദായിനി സരസ്വതി നൗമി നിത്യം.
മാതസ്ത്വദീയപദ- പങ്കജഭക്തിയുക്താ
യേ ത്വാം ഭജന്തി നിഖിലാനപരാന്വിഹായ.
തേ നിർജരത്വമിഹ യാന്തി കലേവരേണ
ഭൂവഹ്നിവായുഗഗനാ- ംബുവിനിർമിതേന.
മോഹാന്ധകാരഭരിതേ ഹൃദയേ മദീയേ
മാതഃ സദൈവ കുരു വാസമുദാരഭാവേ.
സ്വീയാഖിലാവയവ- നിർമലസുപ്രഭാഭിഃ
ശീഘ്രം വിനാശയ മനോഗതമന്ധകാരം.
ബ്രഹ്മാ ജഗത് സൃജതി പാലയതീന്ദിരേശഃ
ശംഭുർവിനാശയതി ദേവി തവ പ്രഭാവൈഃ.
ന സ്യാത് കൃപാ യദി തവ പ്രകടപ്രഭാവേ
ന സ്യുഃ കഥഞ്ചിദപി തേ നിജകാര്യദക്ഷാഃ.
ലക്ഷ്മിർമേധാ ധരാ പുഷ്ടിർഗൗരീ തൃഷ്ടിഃ പ്രഭാ ധൃതിഃ.
ഏതാഭിഃ പാഹി തനുഭിരഷ്ടഭിർമാം സരസ്വതി.
സരസ്വതി മഹാഭാഗേ വിദ്യേ കമലലോചനേ.
വിദ്യാരൂപേ വിശാലാക്ഷി വിദ്യാം ദേഹി നമോഽസ്തു തേ.
യദക്ഷരപദഭ്രഷ്ടം മാത്രാഹീനം ച യദ്ഭവേത്.
തത്സർവം ക്ഷമ്യതാം ദേവി പ്രസീദ പരമേശ്വരി.