മഹാ സരസ്വതീ സ്തോത്രം
അശ്വതര ഉവാച -
ജഗദ്ധാത്രീമഹം ദേവീമാരിരാധയിഷുഃ ശുഭാം .
സ്തോഷ്യേ പ്രണമ്യ ശിരസാ ബ്രഹ്മയോനിം സരസ്വതീം ..
സദസദ്ദേവി സത്കിഞ്ചിന്മോക്ഷവച്ചാർഥവത്പദം .
തത്സർവം ത്വയ്യസംയോഗം യോഗവദ്ദേവി സംസ്ഥിതം ..
ത്വമക്ഷരം പരം ദേവി യത്ര സർവം പ്രതിഷ്ഠിതം .
അക്ഷരം പരമം ദേവി സംസ്ഥിതം പരമാണുവത് ..
അക്ഷരം പരമം ബ്രഹ്മ വിശ്വഞ്ചൈതത്ക്ഷരാത്മകം .
ദാരുണ്യവസ്ഥിതോ വഹ്നിർഭൗമാശ്ച പരമാണവഃ ..
തഥാ ത്വയി സ്ഥിതം ബ്രഹ്മ ജഗച്ചേദമശേഷതഃ .
ഓങ്കാരാക്ഷരസംസ്ഥാനം യത്തു ദേവി സ്ഥിരാസ്ഥിരം ..
തത്ര മാത്രാത്രയം സർവമസ്തി യദ്ദേവി നാസ്തി ച .
ത്രയോ ലോകാസ്ത്രയോ വേദാസ്ത്രൈവിദ്യം പാവകത്രയം ..
ത്രീണി ജ്യോതീംഷി വർണാശ്ച ത്രയോ ധർമാഗമാസ്തഥാ .
ത്രയോ ഗുണാസ്ത്രയഃ ശബ്ദസ്ത്രയോ വേദാസ്തഥാശ്രമാഃ ..
ത്രയഃ കാലാസ്തഥാവസ്ഥാഃ പിതരോഽഹർനിശാദയഃ .
ഏതന്മാത്രാത്രയം ദേവി തവ രൂപം സരസ്വതി ..
വിഭിന്നദർശിനാമാദ്യാ ബ്രഹ്മണോ ഹി സനാതനാഃ .
സോമസംസ്ഥാ ഹവിഃ സംസ്ഥാഃ പാകസംസ്ഥാശ്ച സപ്ത യാഃ ..
താസ്ത്വദുച്ചാരണാദ്ദേവി ക്രിയന്തേ ബ്രഹ്മവാദിഭിഃ .
അനിർദേശ്യം തഥാ ചാന്യദർധമാത്രാന്വിതം പരം ..
അവികാര്യക്ഷയം ദിവ്യം പരിണാമവിവർജിതം .
തവൈതത്പരമം രൂപം യന്ന ശക്യം മയോദിതും ..
ന ചാസ്യേ ന ച തജ്ജിഹ്വാ താമ്രോഷ്ഠാദിഭിരുച്യതേ .
ഇന്ദ്രോഽപി വസവോ ബ്രഹ്മാ ചന്ദ്രാർകൗ ജ്യോതിരേവ ച ..
വിശ്വാവാസം വിശ്വരൂപം വിശ്വേശം പരമേശ്വരം .
സാംഖ്യവേദാന്തവാദോക്തം ബഹുശാഖാസ്ഥിരീകൃതം ..
അനാദിമധ്യനിധനം സദസന്ന സദേവ യത് .
ഏകന്ത്വനേകം നാപ്യേകം ഭവഭേദസമാശ്രൈതം ..
അനാഖ്യം ഷഡ്ഗുണാഖ്യഞ്ച വർഗാഖ്യം ത്രിഗുണാശ്രയം .
നാനാശക്തിമതാമേകം ശക്തിവൈഭവികം പരം ..
സുഖാസുഖം മഹാസൗഖ്യരൂപം ത്വയി വിഭാവ്യതേ .
ഏവം ദേവി ത്വയാ വ്യാപ്തം സകലം നിഷ്കലഞ്ച യത് .
അദ്വൈതാവസ്ഥിതം ബ്രഹ്മ യച്ച ദ്വൈതേ വ്യവസ്ഥിതം ..
യേഽർഥാ നിത്യാ യേ വിനശ്യന്തി ചാന്യേ
യേ വാ സ്ഥൂലാ യേ ച സൂക്ഷ്മാതിസൂക്ഷ്മാഃ .
യേ വാ ഭൂമൗ യേഽന്തരീക്ഷേഽന്യതോ വാ
തേഷാം തേഷാം ത്വത്ത ഏവോപലബ്ധിഃ ..
യച്ചാമൂർതം യച്ച മൂർതം സമസ്തം
യദ്വാ ഭൂതേഷ്വേകമേകഞ്ച കിഞ്ചിത് .
യദ്ദിവ്യസ്തി ക്ഷ്മാതലേ ഖേഽന്യതോ വാ
ത്വത്സംബദ്ധം ത്വത്സ്വരൈർവ്യഞ്ജനൈശ്ച ..
Other stotras
