സംഗീത ജ്ഞാനദ സരസ്വതീ സ്തോത്രം

ശാരദാം ചന്ദ്രവദനാം വീണാപുസ്തകധാരിണീം .
സംഗീതവിദ്യാധിഷ്ഠാത്രീം നമസ്യാമി സരസ്വതീം ..

ശ്വേതാംബരധരേ ദേവി ശ്വേതപദ്മാസനേ ശുഭേ.
ശ്വേതഗന്ധാർചിതാംഘ്രിം ത്വാം നമസ്യാമി സരസ്വതീം ..

യാ ദേവീ സർവവാദ്യേഷു ദക്ഷാ സംഗീതവർതിനീ .
യാ സദാ ജ്ഞാനദാ ദേവീ നമസ്യാമി സരസ്വതി ..

ശാരദേ സർവവാദ്യേഷു ദക്ഷം മാം കുരു പാഹി മാം .
സിദ്ധിം ദേഹി സദാ ദേവി ജിഹ്വായാം തിഷ്ഠ മേ സ്വയം ..

ജ്ഞാനം ദേഹി സ്വരസ്യാപി ലയതാലഗുണം മമ .
ഭക്തിം ച യച്ഛ മേ നിത്യം സരസ്വതി നമോഽസ്തു തേ ..

വിദ്യാം ബുദ്ധിം ച മേ ദേവി പ്രയച്ഛാഽദ്യ സരസ്വതി .
യശോ മേ ശാശ്വതം ദേഹി വരദാ ഭവ മേ സദാ ..

പ്രണമാമി ജഗദ്ധാത്രീം വാഗീശാനീം സരസ്വതീം .
സംഗീതേ ദേഹി സിദ്ധിം മേ ഗീതേ വാദ്യേ മഹാമതി ..

സരസ്വത്യാ ഇദം സ്തോത്രം യഃ പഠേദ്ഭക്തിമാൻ നരഃ .
സംഗീതസ്വരതാലേഷു സമവാപ്നോത്യഭിജ്ഞതാം ..