Lalita Hridaya Stotram

बालव्यक्तविभाकरामितनिभां भव्यप्रदां भारती-
मीषत्फुल्लमुखाम्बुजस्मितकरैराशाभवान्धापहाम् ।
पाशं साभयमङ्कुशं च वरदं सम्बिभ्रतीं भूतिदां
भ्राजन्तीं चतुरम्बुजाकृतकरैर्भक्त्या भजे षोडशीम् ॥
सुन्दरी सकलकल्मषापहा कोटिकञ्जकमनीयकान्तिका ।
कोटिकल्पकृतपुण्यकर्मणा पूजनीयपदपुण्यपुष्करा ॥
शर्वरीशसमसुन्दरानना श्रीशशक्तिसुकृताश्रयाश्रिता ।
सज्जनानुशरणीयसत्पदा सङ्कटे सुरगणैः सुवन्दिता ॥
या सुरासुररणे जवान्विता ह्याजघान जगदम्बिकाऽजिता ।
तां भजामि जननीं जगज्जनिं युद्धयुक्तदितिजान् सुदुर्जयान् ॥
योगिनां हृदयसङ्गतां शिवां योगयुक्तमनसां यतात्मनाम् ।
जाग्रतीं जगति यत्नतो द्विजा यां जपन्ति हृदि तां भजाम्यहम् ॥
कल्पकास्तु कलयन्ति कालिकां यत्कला कलिजनोपकारिका ।
कौलिकालिकलिताङ्घ्रिपङ्कजां तां भजामि कलिकल्मषापहाम् ॥
बालार्कानन्तशोचिर्न्निजतनुकिरणैर्द्दीपयन्तीं दिगन्तान्
दीप्तैर्द्देदीप्तमानां दनुजदलवनानल्पदावानलाभाम् ।
दान्तोदन्तोग्रचितां दलितदितिसुतां दर्शनीयां दुरन्तां
देवीं दीनार्द्रचित्तां हृदि मुदितमनाः षोडशीं संस्मरामि ॥
धीरान्धन्यान्धरित्रीधवविधृतशिरो धूतधूल्यब्जपादां
घृष्टान्धाराधराधो विनिधृतचपलाचारुचन्द्रप्रभाभाम् ।
धर्म्यान्धूतोपहारान् धरणिसुरधवोद्धारिणीं ध्येयरूपां
धीमद्धन्यातिधन्यान्धनदधनवृतां सुन्दरीं चिन्तयामि ॥
जयतु जयतु जल्पा योगिनी योगयुक्ता
जयतु जयतु सौम्या सुन्दरी सुन्दरास्या ।
जयतु जयतु पद्मा पद्मिनी केशवस्य
जयतु जयतु काली कालिनी कालकान्ता ॥
जयतु जयतु खर्वा षोडशी वेदहस्ता
जयतु जयतु धात्री धर्मिणी धातृशान्तिः ।
जयतु जयतु वाणी ब्रह्मणो ब्रह्मवन्द्या
जयतु जयतु दुर्गा दारिणी देवशत्रोः ॥
देवि त्वं सृष्टिकाले कमलभवभृता राजसी रक्तरूपा
रक्षाकाले त्वमम्बा हरिहृदयधृता सात्विकी श्वेतरूपा ।
भूरिक्रोधा भवान्ते भवभवनगता तामसी कृष्णरूपा
एताश्चान्यास्त्वमेव क्षितमनुजमला सुन्दरी केवलाद्या ॥
सुमलशमनमेतद्देवि गोप्यं गुणज्ञे
ग्रहणमननयोग्यं षोडशीयं खलघ्नम् ।
सुरतरुसमशीलं सम्प्रदं पाठकानां
प्रभवति हृदयाख्यं स्तोत्रमत्यन्तमान्यम् ॥
इदं त्रिपुरसुन्दर्याः षोडश्याः परमाद्भुतम् ।
यः श‍ृणोति नरः स्तोत्रं स सदा सुखमश्नुते ॥

baalavyaktavibhaakaraamitanibhaam' bhavyapradaam' bhaaratee-
meeshatphullamukhaambujasmitakarairaashaabhavaandhaapahaam .
paasham' saabhayamankusham' cha varadam' sambibhrateem' bhootidaam'
bhraajanteem' chaturambujaakri'takarairbhaktyaa bhaje shod'asheem ..
sundaree sakalakalmashaapahaa kot'ikanjakamaneeyakaantikaa .
kot'ikalpakri'tapunyakarmanaa poojaneeyapadapunyapushkaraa ..
sharvareeshasamasundaraananaa shreeshashaktisukri'taashrayaashritaa .
sajjanaanusharaneeyasatpadaa sankat'e suraganaih' suvanditaa ..
yaa suraasurarane javaanvitaa hyaajaghaana jagadambikaa'jitaa .
taam' bhajaami jananeem' jagajjanim' yuddhayuktaditijaan sudurjayaan ..
yoginaam' hri'dayasangataam' shivaam' yogayuktamanasaam' yataatmanaam .
jaagrateem' jagati yatnato dvijaa yaam' japanti hri'di taam' bhajaamyaham ..
kalpakaastu kalayanti kaalikaam' yatkalaa kalijanopakaarikaa .
kaulikaalikalitaanghripankajaam' taam' bhajaami kalikalmashaapahaam ..
baalaarkaanantashochirnnijatanukiranairddeepayanteem' digantaan
deeptairddedeeptamaanaam' danujadalavanaanalpadaavaanalaabhaam .
daantodantograchitaam' dalitaditisutaam' darshaneeyaam' durantaam'
deveem' deenaardrachittaam' hri'di muditamanaah' shod'asheem' sam'smaraami ..
dheeraandhanyaandharitreedhavavidhri'tashiro dhootadhoolyabjapaadaam'
ghri'sht'aandhaaraadharaadho vinidhri'tachapalaachaaruchandraprabhaabhaam .
dharmyaandhootopahaaraan dharanisuradhavoddhaarineem' dhyeyaroopaam'
dheemaddhanyaatidhanyaandhanadadhanavri'taam' sundareem' chintayaami ..
jayatu jayatu jalpaa yoginee yogayuktaa
jayatu jayatu saumyaa sundaree sundaraasyaa .
jayatu jayatu padmaa padminee keshavasya
jayatu jayatu kaalee kaalinee kaalakaantaa ..
jayatu jayatu kharvaa shod'ashee vedahastaa
jayatu jayatu dhaatree dharminee dhaatri'shaantih' .
jayatu jayatu vaanee brahmano brahmavandyaa
jayatu jayatu durgaa daarinee devashatroh' ..
devi tvam' sri'sht'ikaale kamalabhavabhri'taa raajasee raktaroopaa
rakshaakaale tvamambaa harihri'dayadhri'taa saatvikee shvetaroopaa .
bhoorikrodhaa bhavaante bhavabhavanagataa taamasee kri'shnaroopaa
etaashchaanyaastvameva kshitamanujamalaa sundaree kevalaadyaa ..
sumalashamanametaddevi gopyam' gunajnye
grahanamananayogyam' shod'asheeyam' khalaghnam .
suratarusamasheelam' sampradam' paat'hakaanaam'
prabhavati hri'dayaakhyam' stotramatyantamaanyam ..
idam' tripurasundaryaah' shod'ashyaah' paramaadbhutam .
yah' shri'noti narah' stotram' sa sadaa sukhamashnute ..