ദേവീ മാഹാത്മ്യം - പ്രാധാനിക രഹസ്യം

അഥ പ്രാധാനികം രഹസ്യം .
അസ്യ ശ്രീസപ്തശതീരഹസ്യത്രയസ്യ . ബ്രഹ്മവിഷ്ണുരുദ്രാ-ഋഷയഃ . മഹാകാലീമഹാലക്ഷീമഹാസരസ്വത്യോ ദേവതാഃ . അനുഷ്ടുപ് ഛന്ദഃ . നവദുർഗാമഹാലക്ഷ്മീർബീജം . ശ്രീം ശക്തിഃ . സകല-അഭീഷ്ടഫലസിദ്ധയേ സപ്തശതീപാഠാന്തേ ജപേ വിനിയോഗഃ .
രാജോവാച .
ഭഗവന്നവതാരാ മേ ചണ്ഡികായാസ്ത്വയോദിതാഃ .
ഏതേഷാം പ്രകൃതിം ബ്രഹ്മൻ പ്രധാനം വക്തുമർഹസി .
ആരാധ്യം യന്മയാ ദേവ്യാഃ സ്വരൂപം യേന വൈ ദ്വിജ .
വിധിനാ ബ്രൂഹി സകലം യഥാവത് പ്രണതസ്യ മേ .
ഋഷിരുവാച .
ഇദം രഹസ്യം പരമമനാഖ്യേയം പ്രചക്ഷതേ .
ഭക്തോഽസീതി ന മേ കിഞ്ചിത് തവാവാച്യം നരാഽധിപ .
സർവസ്യാദ്യാ മഹാലക്ഷ്മീസ്ത്രിഗുണാ പരമേശ്വരീ .
ലക്ഷ്യാലക്ഷ്യസ്വരൂപാ സാ വ്യാപ്യ കൃത്സ്നം വ്യവസ്ഥിതാ .
മാതുലിംഗം ഗദാം ഖേടം പാനപാത്രം ച ബിഭ്രതീ .
നാഗം ലിംഗം ച യോനിം ച ബിഭ്രതീ നൃപ മൂർധനി .
തപ്തകാഞ്ചനവർണാഭാ തപ്തകാഞ്ചനഭൂഷണാ .
ശൂന്യം തദഖിലം സ്വേന പൂരയാമാസ തേജസാ .
ശൂന്യം തദഖിലം ലോകം വിലോക്യ പരമേശ്വരീ .
ബഭാര രൂപമപരം തമസാ കേവലേന ഹി .
സാ ഭിന്നാഞ്ജനസങ്കാശാ ദംഷ്ട്രാഞ്ചിതവരാനനാ .
വിശാലലോചനാ നാരീ ബഭൂവ തനുമധ്യമാ .
ഖഡ്ഗപാത്രശിരഃഖേടൈരലങ്കൃതചതുർഭുജാ .
കബന്ധഹാരം ശിരസാ ബിഭ്രാണാ ഹി ശിരഃസ്രജം .
താം പ്രോവാച മഹാലക്ഷ്മീസ്താമസീം പ്രമദോത്തമാം .
ദദാമി തവ നാമാനി യാനി കർമാണി താനി തേ .
മഹാമായാ മഹാകാലീ മഹാമാരീ ക്ഷുധാ രുഷാ .
നിദ്രാ തൃഷ്ണാ ചൈകവീരാ കാലരാത്രിർദുരത്യയാ .
ഇമാനി തവ നാമാനി പ്രതിപാദ്യാനി കർമഭിഃ .
ഏഭിഃ കർമാണി തേ ജ്ഞാത്വാ യോഽധീതേ സോഽശ്നുതേ സുഖം .
താമിത്യുക്ത്വാ മഹാലക്ഷ്മീഃ സ്വരൂപമമരം നൃപ .
സത്ത്വാഖ്യേനാഽതിശുദ്ധേന ഗുണേനേന്ദുപ്രഭം ദധൗ .
അക്ഷമാലാങ്കുശധരാ വീണാപുസ്തകധാരിണീ .
സാ ബഭൂവ വരാ നാരീ നാമാന്യസ്യൈ ച സാ ദദൗ .
മഹാവിദ്യാ മഹാവാണീ ഭാരതീ വാക് സരസ്വതീ .
ആര്യാ ബ്രാഹ്മീ കാമധേനുർവേദഗർഭാ സുരേശ്വരീ .
അഥോവാച മഹാലക്ഷ്മീർമഹാകാലീം സരസ്വതീം .
യുവാം ജനയതാം ദേവ്യൗ മിഥുനേ സ്വാനുരൂപതഃ .
ഇത്യുക്ത്വാ തേ മഹാലക്ഷ്മീഃ സസർജ മിഥുനം സ്വയം .
ഹിരണ്യഗർഭൗ രുചിരൗ സ്ത്രീപുംസൗ കമലാസനൗ .
ബ്രഹ്മൻ വിധേ വിരിഞ്ചേതി ധാതരിത്യാഹ തം നരം .
ശ്രീഃ പദ്മേ കമലേ ലക്ഷ്മീമീത്യാഹ മാതാ സ്ത്രിയം ച താം .
മഹാകാലീ ഭാരതീ ച മിഥുനേ സൃജതഃ സഹ .
ഏതയോരപി രൂപാണി നാമാനി ച വദാമി തേ .
നീലകണ്ഠം രക്തബാഹും ശ്വേതാംഗം ചന്ദ്രശേഖരം .
ജനയാമാസ പുരുഷം മഹാകാലീം സിതാം സ്ത്രിയം .
സ രുദ്രഃ ശങ്കരഃ സ്ഥാണുഃ കപർദീ ച ത്രിലോചനഃ .
ത്രയീ വിദ്യാ കാമധേനുഃ സാ സ്ത്രീ ഭാഷാ സ്വരാഽക്ഷരാ .
സരസ്വതീ സ്ത്രിയം ഗൗരീം കൃഷ്ണം ച പുരുഷം നൃപ .
ജനയാമാസ നാമാനി തയോരപി വദാമി തേ .
വിഷ്ണുഃ കൃഷ്ണോ ഹൃഷീകേശോ വാസുദേവോ ജനാർദനഃ .
ഉമാ ഗൗരീ സതീ ചണ്ഡീ സുന്ദരീ സുഭഗാ ശുഭാ .
ഏവം യുവതയഃ സദ്യഃ പുരുഷത്വം പ്രപേദിരേ .
ചാക്ഷുഷ്മന്തോ നു പശ്യന്തി നേതരേഽതദ്വിദോ ജനാഃ .
ബ്രഹ്മണേ പ്രദദൗ പത്നീം മഹാലക്ഷ്മീർനൃപ ത്രയീം .
രുദ്രായ ഗൗരീം വരദാം വാസുദേവായ ച ശ്രിയം .
സ്വരയാ സഹ സംഭൂയ വിരിഞ്ചോഽണ്ഡമജീജനത് .
ബിഭേദ ഭഗവാൻ രുദ്രസ്തദ് ഗൗര്യാ സഹ വീര്യവാൻ .
അണ്ഡമധ്യേ പ്രധാനാദി കാര്യജാതമഭൂന്നൃപ .
മഹാഭൂതാത്മകം സർവം ജഗത്സ്ഥാവരജംഗമം .
പുപോഷ പാലയാമാസ തല്ലക്ഷ്മ്യാ സഹ കേശവഃ .
മഹാലക്ഷ്മീരേവമജാ സാഽപി സർവേശ്വരേശ്വരീ .
നിരാകാരാ ച സാകാരാ സൈവ നാനാഭിധാനഭൃത് .
നാമാന്തരൈർനിരൂപ്യൈഷാ നാമ്നാ നാഽന്യേന കേനചിത് .
മാർകണ്ഡേയപുരാണേ പ്രാധാനികം രഹസ്യം .