ദേവീ മാഹാത്മ്യം - അധ്യായം 4
ഓം ഋഷിരുവാച .
ശക്രാദയഃ സുരഗണാ നിഹതേഽതിവീര്യേ
തസ്മിന്ദുരാത്മനി സുരാരിബലേ ച ദേവ്യാ .
താം തുഷ്ടുവുഃ പ്രണതിനമ്രശിരോധരാംസാ
വാഗ്ഭിഃ പ്രഹർഷപുലകോദ്ഗമചാരുദേഹാഃ .
ദേവ്യാ യയാ തതമിദം ജഗദാത്മശക്ത്യാ
നിഃശേഷദേവഗണശക്തിസമൂഹമൂർത്യാ .
താമംബികാമഖിലദേവമഹർഷിപൂജ്യാം
ഭക്ത്യാ നതാഃ സ്മ വിദധാതു ശുഭാനി സാ നഃ .
യസ്യാഃ പ്രഭാവമതുലം ഭഗവാനനന്തോ
ബ്രഹ്മാ ഹരശ്ച ന ഹി വക്തുമലം ബലം ച .
സാ ചണ്ഡികാഖിലജഗത്പരിപാലനായ
നാശായ ചാശുഭഭയസ്യ മതിം കരോതു .
യാ ശ്രീഃ സ്വയം സുകൃതിനാം ഭവനേഷ്വലക്ഷ്മീഃ
പാപാത്മനാം കൃതധിയാം ഹൃദയേഷു ബുദ്ധിഃ .
ശ്രദ്ധാ സതാം കുലജനപ്രഭവസ്യ ലജ്ജാ
താം ത്വാം നതാഃ സ്മ പരിപാലയ ദേവി വിശ്വം .
കിം വർണയാമ തവ രൂപമചിന്ത്യമേതത്
കിഞ്ചാതിവീര്യമസുരക്ഷയകാരി ഭൂരി .
കിം ചാഹവേഷു ചരിതാനി തവാതി യാനി
സർവേഷു ദേവ്യസുരദേവഗണാദികേഷു .
ഹേതുഃ സമസ്തജഗതാം ത്രിഗുണാപി ദോഷൈ-
ര്ന ജ്ഞായസേ ഹരിഹരാദിഭിരപ്യപാരാ .
സർവാശ്രയാഖിലമിദം ജഗദംശഭൂത-
മവ്യാകൃതാ ഹി പരമാ പ്രകൃതിസ്ത്വമാദ്യാ .
യസ്യാഃ സമസ്തസുരതാ സമുദീരണേന
തൃപ്തിം പ്രയാതി സകലേഷു മഖേഷു ദേവി .
സ്വാഹാസി വൈ പിതൃഗണസ്യ ച തൃപ്തിഹേതു-
രുച്ചാര്യസേ ത്വമത ഏവ ജനൈഃ സ്വധാ ച .
യാ മുക്തിഹേതുരവിചിന്ത്യമഹാവ്രതാ ത്വം
അഭ്യസ്യസേ സുനിയതേന്ദ്രിയതത്ത്വസാരൈഃ .
മോക്ഷാർഥിഭിർമുനിഭിരസ്തസമസ്തദോഷൈ-
ര്വിദ്യാസി സാ ഭഗവതീ പരമാ ഹി ദേവി .
ശബ്ദാത്മികാ സുവിമലർഗ്യജുഷാം നിധാന-
മുദ്ഗീഥരമ്യപദപാഠവതാം ച സാമ്നാം .
ദേവി ത്രയീ ഭഗവതീ ഭവഭാവനായ
വാർതാസി സർവജഗതാം പരമാർതിഹന്ത്രീ .
മേധാസി ദേവി വിദിതാഖിലശാസ്ത്രസാരാ
ദുർഗാസി ദുർഗഭവസാഗരനൗരസംഗാ .
ശ്രീഃ കൈടഭാരിഹൃദയൈകകൃതാധിവാസാ
ഗൗരീ ത്വമേവ ശശിമൗലികൃതപ്രതിഷ്ഠാ .
ഈഷത്സഹാസമമലം പരിപൂർണചന്ദ്ര-
ബിംബാനുകാരി കനകോത്തമകാന്തികാന്തം .
അത്യദ്ഭുതം പ്രഹൃതമാത്തരുഷാ തഥാപി
വക്ത്രം വിലോക്യ സഹസാ മഹിഷാസുരേണ .
ദൃഷ്ട്വാ തു ദേവി കുപിതം ഭ്രുകുടീകരാല-
മുദ്യച്ഛശാങ്കസദൃശച്ഛവി യന്ന സദ്യഃ .
പ്രാണാൻ മുമോച മഹിഷസ്തദതീവ ചിത്രം
കൈർജീവ്യതേ ഹി കുപിതാന്തകദർശനേന .
ദേവി പ്രസീദ പരമാ ഭവതീ ഭവായ
സദ്യോ വിനാശയസി കോപവതീ കുലാനി .
വിജ്ഞാതമേതദധുനൈവ യദസ്തമേത-
ന്നീതം ബലം സുവിപുലം മഹിഷാസുരസ്യ .
തേ സമ്മതാ ജനപദേഷു ധനാനി തേഷാം
തേഷാം യശാംസി ന ച സീദതി ബന്ധുവർഗഃ .
ധന്യാസ്ത ഏവ നിഭൃതാത്മജഭൃത്യദാരാ
യേഷാം സദാഭ്യുദയദാ ഭവതീ പ്രസന്നാ .
ധർമ്യാണി ദേവി സകലാനി സദൈവ കർമാ-
ണ്യത്യാദൃതഃ പ്രതിദിനം സുകൃതീ കരോതി .
സ്വർഗം പ്രയാതി ച തതോ ഭവതീ പ്രസാദാ-
ല്ലോകത്രയേഽപി ഫലദാ നനു ദേവി തേന .
ദുർഗേ സ്മൃതാ ഹരസി ഭീതിമശേഷജന്തോഃ
സ്വസ്ഥൈഃ സ്മൃതാ മതിമതീവ ശുഭാം ദദാസി .
ദാരിദ്ര്യദുഃഖഭയഹാരിണി കാ ത്വദന്യാ
സർവോപകാരകരണായ സദാർദ്രചിത്താ .
ഏഭിർഹതൈർജഗദുപൈതി സുഖം തഥൈതേ
കുർവന്തു നാമ നരകായ ചിരായ പാപം .
സംഗ്രാമമൃത്യുമധിഗമ്യ ദിവം പ്രയാന്തു
മത്വേതി നൂനമഹിതാന്വിനിഹംസി ദേവി .
ദൃഷ്ട്വൈവ കിം ന ഭവതീ പ്രകരോതി ഭസ്മ
സർവാസുരാനരിഷു യത്പ്രഹിണോഷി ശസ്ത്രം .
ലോകാൻപ്രയാന്തു രിപവോഽപി ഹി ശസ്ത്രപൂതാ
ഇത്ഥം മതിർഭവതി തേഷ്വഹിതേഷുസാധ്വീ .
ഖഡ്ഗപ്രഭാനികരവിസ്ഫുരണൈസ്തഥോഗ്രൈഃ
ശൂലാഗ്രകാന്തിനിവഹേന ദൃശോഽസുരാണാം .
യന്നാഗതാ വിലയമംശുമദിന്ദുഖണ്ഡ-
യോഗ്യാനനം തവ വിലോകയതാം തദേതത് .
ദുർവൃത്തവൃത്തശമനം തവ ദേവി ശീലം
രൂപം തഥൈതദവിചിന്ത്യമതുല്യമന്യൈഃ .
വീര്യം ച ഹന്തൃ ഹൃതദേവപരാക്രമാണാം
വൈരിഷ്വപി പ്രകടിതൈവ ദയാ ത്വയേത്ഥം .
കേനോപമാ ഭവതു തേഽസ്യ പരാക്രമസ്യ
രൂപം ച ശത്രുഭയകാര്യതിഹാരി കുത്ര .
ചിത്തേ കൃപാ സമരനിഷ്ഠുരതാ ച ദൃഷ്ടാ
ത്വയ്യേവ ദേവി വരദേ ഭുവനത്രയേഽപി .
ത്രൈലോക്യമേതദഖിലം രിപുനാശനേന
ത്രാതം ത്വയാ സമരമൂർധനി തേഽപി ഹത്വാ .
നീതാ ദിവം രിപുഗണാ ഭയമപ്യപാസ്തം
അസ്മാകമുന്മദസുരാരിഭവം നമസ്തേ .
ശൂലേന പാഹി നോ ദേവി പാഹി ഖഡ്ഗേന ചാംബികേ .
ഘണ്ടാസ്വനേന നഃ പാഹി ചാപജ്യാനിഃസ്വനേന ച .
പ്രാച്യാം രക്ഷ പ്രതീച്യാം ച ചണ്ഡികേ രക്ഷ ദക്ഷിണേ .
ഭ്രാമണേനാത്മശൂലസ്യ ഉത്തരസ്യാം തഥേശ്വരി .
സൗമ്യാനി യാനി രൂപാണി ത്രൈലോക്യേ വിചരന്തി തേ .
യാനി ചാത്യന്തഘോരാണി തൈ രക്ഷാസ്മാംസ്തഥാ ഭുവം .
ഖഡ്ഗശൂലഗദാദീനി യാനി ചാസ്ത്രാനി തേഽംബികേ .
കരപല്ലവസംഗീനി തൈരസ്മാന്രക്ഷ സർവതഃ .
ഋഷിരുവാച .
ഏവം സ്തുതാ സുരൈർദിവ്യൈഃ കുസുമൈർനന്ദനോദ്ഭവൈഃ .
അർചിതാ ജഗതാം ധാത്രീ തഥാ ഗന്ധാനുലേപനൈഃ .
ഭക്ത്യാ സമസ്തൈസ്ത്രിദശൈർദിവ്യൈർധൂപൈഃ സുധൂപിതാ .
പ്രാഹ പ്രസാദസുമുഖീ സമസ്താൻ പ്രണതാൻ സുരാൻ .
ദേവ്യുവാച .
വ്രിയതാം ത്രിദശാഃ സർവേ യദസ്മത്തോഽഭിവാഞ്ഛിതം .
ദേവാ ഊചുഃ .
ഭഗവത്യാ കൃതം സർവം ന കിഞ്ചിദവശിഷ്യതേ .
യദയം നിഹതഃ ശത്രുരസ്മാകം മഹിഷാസുരഃ .
യദി ചാപി വരോ ദേയസ്ത്വയാസ്മാകം മഹേശ്വരി .
സംസ്മൃതാ സംസ്മൃതാ ത്വം നോ ഹിംസേഥാഃ പരമാപദഃ .
യശ്ച മർത്യഃ സ്തവൈരേഭിസ്ത്വാം സ്തോഷ്യത്യമലാനനേ .
തസ്യ വിത്തർദ്ധിവിഭവൈർധനദാരാദിസമ്പദാം .
വൃദ്ധയേഽസ്മത്പ്രസന്നാ ത്വം ഭവേഥാഃ സർവദാംബികേ .
ഋഷിരുവാച .
ഇതി പ്രസാദിതാ ദേവൈർജഗതോഽർഥേ തഥാത്മനഃ .
തഥേത്യുക്ത്വാ ഭദ്രകാലീ ബഭൂവാന്തർഹിതാ നൃപ .
ഇത്യേതത്കഥിതം ഭൂപ സംഭൂതാ സാ യഥാ പുരാ .
ദേവീ ദേവശരീരേഭ്യോ ജഗത്ത്രയഹിതൈഷിണീ .
പുനശ്ച ഗൗരീദേഹാത്സാ സമുദ്ഭൂതാ യഥാഭവത് .
വധായ ദുഷ്ടദൈത്യാനാം തഥാ ശുംഭനിശുംഭയോഃ .
രക്ഷണായ ച ലോകാനാം ദേവാനാമുപകാരിണീ .
തച്ഛൃണുഷ്വ മയാഖ്യാതം യഥാവത്കഥയാമി തേ .
. ഹ്രീം ഓം .
ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ ശക്രാദിസ്തുതിർനാമ ചതുർഥഃ.
ഈ മന്ത്രം കേൾക്കാൻ ദീക്ഷ ആവശ്യമാണോ?
ആവശ്യമില്ല. മന്ത്ര സാധന ചെയ്യണമെങ്കിൽ മാത്രമേ ദീക്ഷ ആവശ്യമുള്ളൂ, കേൾക്കാൻ ആവശ്യമില്ല. പ്രയോജനം ലഭിക്കാൻ ഞങ്ങൾ നൽകുന്ന മന്ത്രങ്ങൾ കേട്ടാൽ മാത്രം മതി.
Mantras
മന്ത്രങ്ങള്
Click on any topic to open
7
30
Astrology
Bhagavad Gita
Bhagavatam
Bharat Matha
Devi
Devi Mahatmyam
Ganapathy
Garuda Puranam
Glory of Venkatesha
Hanuman
Kathopanishad
Mahabharatam
Mantra Shastra
Mystique
Practical Wisdom
Purana Stories
Radhe Radhe
Ramayana
Rare Topics
Rigveda Explained
Rituals
Sages and Saints
Shiva
Spiritual books
Sri Suktam
Story of Sri Yantra
Temples
Vedas
Vishnu Sahasranama
Yoga Vasishta
26
17
10
0
Copyright © 2026 | Vedadhara | All Rights Reserved. | Designed & Developed by Claps and Whistles
