എന്താണ് ചതുശ്ശതം ?

കേരളത്തിലെ ഒട്ടുമിക്ക പ്രധാന ക്ഷേത്രങ്ങളിലുമുള്ള ഒരു വഴിപാടാണ് ചതുശ്ശതം.

ചതുശ്ശതം എന്നാൽ 400 എന്നർത്ഥം. 4 കൂട്ടം,  100 വീതം.  

എന്താണീ 4 കൂട്ടങ്ങള്‍ ?

ഉണക്കലരി - 100 നാഴി - 25.5 kg

ശര്‍ക്കര - 100 പലം - 52.5 kg

തേങ്ങ - 100

കദളിപ്പഴം - 100

തേങ്ങ ഇടിച്ച് പിഴിഞ്ഞ് ഒന്നാം പാലും, രണ്ടാം പാലും, മൂന്നാം പാലുമാക്കി വെയ്ക്കും.

അരി വേവിച്ച് ശര്‍ക്കരയിട്ട് ഇളക്കിക്കൊണ്ടേയിരിക്കും. കദളിപ്പഴവും ചേര്‍ക്കും. ശര്‍ക്കര പാകമായാല്‍ മൂന്നാം പാലും 50 കഴഞ്ച് (250 g) നെയ്യും ചേര്‍ത്തിളക്കി വറ്റിക്കും. പാകത്തിന് വറ്റിയാല്‍ രണ്ടാം പാലും 50 കഴഞ്ച് നെയ്യും ചേര്‍ത്ത് വീണ്ടും ഇളക്കി വറ്റിക്കും. ഇത് കഴിഞ്ഞാല്‍ തീയ്യ് കുറച്ച് ഒന്നാം പാല്‍ ചേര്‍ത്ത് വെക്കും. പിന്നെ ഇളക്കരുത്.  ഇങ്ങനെയാണ് ചതുശ്ശതം ഉണ്ടാക്കുന്നത്.

Knowledge Bank

ഭദ്രകാളി ധ്യാനം

കാളീം മേഘസമപ്രഭാം ത്രിനയനാം വേതാളകണ്ഠസ്ഥിതാം. ഖഡ്ഗം ഖേടകപാലദാരികശിരഃ കൃത്വാ കരാഗ്രേഷു ച. ഭൂതപ്രേതപിശാചമാതൃസഹിതാം മുണ്ഡസ്രജാലംകൃതാം. വന്ദേ ദുഷ്ടമസൂരികാദിവിപദാം സംഹാരിണീമീശ്വരീം. കാര്‍മേഘത്തിന്‍റെ നിറത്തോടും മൂന്ന് കണ്ണുകളോടും കൂടിയവളും, വേതാളത്തിന്‍റെ കഴുത്തില്‍ ഇരിക്കുന്നവളും, കൈകളില്‍ വാള്‍ - പരിച - തലയോട്ടി - ദാരികന്‍റെ തല എന്നിവ ഏന്തിയവളും, ഭൂതങ്ങള്‍ - പ്രേതങ്ങള്‍ - പിശാചുക്കള്‍ - സപ്തമാതൃക്കള്‍ എന്നിവരോട് കൂടിയവളും, മുണ്ഡമാല ധരിച്ചവളും, വസൂരി തുടങ്ങിയ വിപത്തുകളെ ഇല്ലാതാക്കുന്നവളുമായ സര്‍വ്വേശ്വരിയായ കാളിയെ ഞാന്‍ വന്ദിക്കുന്നു.

ഗായത്രീമന്ത്രത്തിന്‍റെ ദേവതയാര്?

സവിതാവ്. സൂര്യന്‍റെ സൃഷ്ട്യുന്മുഖമായ ഭാവമാണ് സവിതാവ്. ശ്രേഷ്ഠനായ സവിതാവ് ഞങ്ങളുടെ ബുദ്ധിയെ പ്രചോദിപ്പിക്കട്ടെ എന്നതാണ് ഗായത്രിയിലെ പ്രാര്‍ഥന. ഗായത്രീമന്ത്രം ജപിച്ചാല്‍ വരുന്ന സാന്നിദ്ധ്യം സവിതാവിന്‍റേതാണെങ്കിലും മന്ത്രത്തിന്‍റെ ശക്തിയ്ക്ക് ദേവീസങ്കല്പമാണ് നല്‍കിയിരിക്കുന്നത്.