ಕೌಸಲ್ಯಾ ನಂದನ ಸ್ತೋತ್ರ

ದಶರಥಾತ್ಮಜಂ ರಾಮಂ ಕೌಸಲ್ಯಾನಂದವರ್ದ್ಧನಂ .
ಜಾನಕೀವಲ್ಲಭಂ ವಂದೇ ಪೂರ್ಣಂ ಬ್ರಹ್ಮಸನಾತನಂ ..

ಕಿರೀಟಕುಂಡಲಜ್ಯೋತ್ಸ್ನಾಮಂಜುಲಂ ರಾಘವಂ ಭಜೇ .
ಧನುರ್ಧರಂ ಸದಾ ಶಾಂತಂ ಸರ್ವದಾ ಸತ್ಕೃಪಾಕರಂ ..

ಶ್ರುತಿಪುರಾಣಸೂತ್ರಾದಿಶಾಸ್ತ್ರೈ ರ್ನಿತ್ಯಂ ವಿವೇಚಿತಂ .
ಋಷಿಮುನೀಂದ್ರವರ್ಯೈಶ್ಚ ವರ್ಣಿತಂ ನೌಮಿ ರಾಘವಂ ..

ಹನುಮತಾ ಸದಾ ವಂದ್ಯಂ ಸೀತಯಾ ಪರಿಶೋಭಿತಂ .
ಲಕ್ಷ್ಮಣೇನ ಸಮಾರಾಧ್ಯಂ ಶ್ರೀಮದ್ರಾಮಂ ಹೃದಾ ಭಜೇ ..

ಶ್ರೀಭರತಾಗ್ರಜಂ ರಾಮಂ ಶತ್ರುಘ್ನಸೇವಿತಂ ಭಜೇ .
ಅಯೋಧ್ಯಾಯಾಂ ಮಹಾಪುರ್ಯಾಂ ಶೋಭಿತಂ ಸೂರ್ಯವಂಶಜಂ ..

ವಶಿಷ್ಠ ಮುನಿನಾ ಸಾರ್ದ್ಧ ರಾಮಂ ಚಾರುವಿಭೂಷಿತಂ .
ಸರಯೂಪುಲಿನೇ ನೌಮಿ ವ್ರಜಂತಂ ಸಹ ಸೀತಯಾ ..

ನವೀನನೀರದಶ್ಯಾಮಂ ನೀಲಾಬ್ಜಮಾಲ್ಯಧಾರಿಣಂ .
ನವವೃಂದಾದಲೈರರ್ಚ್ಯಂ ನೌಮಿ ರಾಮಂ ದಯಾರ್ಣವಂ ..

ರಸಿಕೈಃ ಸದ್ಭಿರಾರಾಧ್ಯಂ ಮಹಾನಂದಸುಧಾಪ್ರದಂ .
ಗೋವಿಪ್ರಪಾಲಕಂ ರಾಮಂ ವಂದೇ ಶ್ರೀರಘುನಂದನಂ ..

ಋಷೀಣಾಂ ಯಾಗರಕ್ಷಾಯಾಂ ಸರ್ವರೂಪೇಣ ತತ್ಪರಂ .
ವೇದವೇದಾಂತತತ್ತ್ವಜ್ಞಂ ಶ್ರೀರಾಮಮಭಿವಾದಯೇ ..

ದಶಾನನನಿಹಂತಾರಂ ದೀನಾನುಗ್ರಹಸಂಪ್ರದಂ
ಅಪರಿಮೇಯಗಾಂಭೀರ್ಯಂ ಶ್ರೀರಾಮಂ ಪ್ರಭಜೇ ಸದಾ ..

ಪರಾತ್ಪರತರಂ ಬ್ರಹ್ಮ ಮನುಜಾಕೃತಿ ಶೋಭನಂ .
ನಾರಾಯಣಂ ಭಜೇ ನಿತ್ಯಂ ರಾಘವಂ ಸಹ ಸೀತಯಾ ..

ಚಿತ್ರಕೂಟೇ ಮಹಾರಣ್ಯೇ ಮಂದಾಕಿನ್ಯಾ ಮಹಾತಟೇ .
ಸೀತಯಾ ಶೋಭಿತಂ ರಾಮಂ ಲಕ್ಷ್ಮಣಸಹಿತಂ ಭಜೇ ..

ಪೀತಕೌಶೇಯವಸ್ತ್ರೇಣ ಲಸಿತಂ ತಿಲಕಾಽಙ್ಕಿತಂ .
ನಾನಾಽಲಂಕಾರಶೋಭಾಽಽಢ್ಯಂ ರಘುನಾಥಂ ಸ್ಮರಾಮ್ಯಹಂ ..

ವಿಲಸಚ್ಚಾರುಚಾಪಂಚ ಕೋಟಿಕಂದರ್ಪಸುಂದರಂ .
ಹನುಮತಾ ಸದಾಽಽರಾಧ್ಯಂ ನಮಾಮಿ ನವವಿಗ್ರಹಂ ..

ಸಾಗರೇ ಸೇತುಕಾರಂಚ ವಿಭೀಷಣಸಹಾಯಕಂ .
ವಾನರಸೈನ್ಯಸಂಘಾತೇ ರಾಜಿತಂ ರಾಘವಂ ಭಜೇ ..

ಶವರೀಬದರೀಮಂಜುಫಲಾಽಽಸ್ವಾದನತತ್ಪರಂ .
ವಂದೇ ಪ್ರಮುದಿತಂ ರಾಮಂ ದಯಾಧಾಮ ಕೃಪಾರ್ಣವಂ ..

ಶ್ರೀರಾಘವಂ ಮಹಾರಾಜಂ ದಿವ್ಯಮಂಗಲವಿಗ್ರಹಂ
ಅನಂತನಿರ್ಜರೈಃ ಸೇವ್ಯಂ ಭಾವಯೇ ಮುದಿತಾನನಂ ..

ನವಜಲಧರಶ್ಯಾಮಂ ಶ್ರೀದಶರಥನಂದನಂ .
ಅಯೋಧ್ಯಾಧಾಮ ಭೂಮಧ್ಯೇ ಶೋಭಿತಮನಿಶಂ ಭಜೇ ..

ಪ್ರಪನ್ನಜೀವನಾಧಾರಂ ಪ್ರಪನ್ನಭಕ್ತವತ್ಸಲಂ .
ಪ್ರಪನ್ನಾಽಽರ್ತಿಹರಂ ರಾಮಂ ಪ್ರಪನ್ನಪೋಷಕಂ ಭಜೇ ..

ಅಚಿಂತ್ಯರೂಪಲಾವಣ್ಯಶಾಂತಿಕಾಂತಿಮನೋಹರಂ .
ಹೇಮಕುಂಡಲಶೋಭಾಢ್ಯಂ ಹೃದಾ ರಾಮಂ ನಮಾಮ್ಯಹಂ ..

ಚಿತ್ರವಿಚಿತ್ರಕೌಶೇಯಾಽಮ್ಬರಶೋಭಿತಮೀಶ್ವರಂ .
ಅವ್ಯಯಮಖಿಲಾತ್ಮಾನಂ ಭಜೇಽಹಂ ರಾಘವಂ ಪ್ರಿಯಂ ..

ವನ್ಯಫಲಾಽಶನಾಽಭ್ಯಸ್ತಂ ಮಂದಾಕಿನ್ಯಾ ಮಹಾತಟೇ .
ಸೀತಯಾ ಶೋಭಿತಂ ರಾಮಂ ಲಕ್ಷ್ಮಣಸಂಯುತಂ ಭಜೇ ..

ನೀಲಾಽರುಣೋತ್ಪಲಾಽಽಛನ್ನೇ ಭ್ರಮರಾವಲಿಗುಂಜಿತೇ .
ಸರಸ್ತಟೇ ಸಮಾಸೀನಂ ರಾಮಂ ರಾಜ್ಞಂ ಸ್ಮರಾಮಿ ತಂ ..

ಕೌಸಲ್ಯಾನಂದನಂ ರಾಮಮಯೋಧ್ಯಾಧಾಮ್ನಿ ಪೂಜಿತಂ .
ಭಾವಯೇ ವಿವಿಧೈರ್ಭಕ್ತೈರ್ಭಕ್ತಮನೋರಥಪ್ರದಂ ..

ಸುಗ್ರೀವರಾಜ್ಯದಾತಾರಂ ಸಮಸ್ತಜಗದಾಶ್ರಯಂ
ಅಸೀಮಕರುಣಾಶೀಲಂ ನಮಾಮಿ ರಾಘವಂ ಮುದಾ ..

ವೃಂದಾಮಾಲ್ಯಧರಂ ರಾಮಂ ಕಲ್ಪವೃಕ್ಷಮಭೀಷ್ಟದಂ .
ತಂಚ ಪ್ರದಾಯಕಂ ನೌಮಿ ಪುರುಷಾರ್ಥಚತುಷ್ಟಯಂ ..

ಕುಸುಮವಾಟಿಕಾಮಧ್ಯೇ ಪುಷ್ಪಾರ್ಥಂ ಪಥಿ ರಾಘವಂ .
ವಿಹರಂತಂ ಮಹೋದರಂ ಲಕ್ಷ್ಮಣೇನ ಸಮಂ ಭಜೇ ..

ಕ್ರೀಡಂತಂ ಸರಯೂತೀರೇ ಭ್ರಾತೃಭಿಃ ಸಹ ಪಾವನೇ .
ಹಸಂತಂ ಹಾಸಯಂತಂಚ ರಾಮಚಂದ್ರಂ ವಿಭಾವಯೇ ..

ರಾಘವಂ ಪರಮೇ ರಮ್ಯೇ ಪ್ರಾಸಾದೇ ಹೇಮನಿರ್ಮಿತೇ .
ಸಿಂಹಾಸನಸಮಾಸೀನಂ ಭಜಾಮಿ ಸಹ ಸೀತಯಾ ..

ಅಶ್ವಾಸೀನಂ ಮಹಾರಣ್ಯೇ ಸ್ವೀಯಪರಿಕರೈಃ ಸಹ .
ಶ್ರೀಭರತಪ್ರಿಯಂ ರಾಮಂ ಪ್ರಣಮಾಮಿ ತಮೀಶ್ವರಂ ..

ದರ್ಶನೀಯಂ ಮಹಾಗಮ್ಯಂ ಸಾಕೇತೇ ಧಾಮ್ನಿ ಶೋಭಿತಂ .
ಅಮಂದಾನಂದಸಂದೋಹಂ ಶ್ರೀರಾಮಂ ಮಧುರಂ ಭಜೇ ..

ಕೌಸಲ್ಯಾನಂದನಸ್ತೋತ್ರಂ ಭುಕ್ತಿಮುಕ್ತಿಪ್ರದಾಯಕಂ .
ರಾಧಾಸರ್ವೇಶ್ವರಾದ್ಯೇನ ಶರಣಾಂತೇನ ನಿರ್ಮಿತಂ ..

Ramaswamy Sastry and Vighnesh Ghanapaathi

Other stotras