Bhagavad Gita - Chapter 12

अथ द्वादशोऽध्यायः ।
भक्तियोगः ।

अर्जुन उवाच -

एवं सततयुक्ता ये भक्तास्त्वां पर्युपासते ।
ये चाप्यक्षरमव्यक्तं तेषां के योगवित्तमाः ॥

श्रीभगवानुवाच -

मय्यावेश्य मनो ये मां नित्ययुक्ता उपासते ।
श्रद्धया परयोपेताः ते मे युक्ततमा मताः ॥

ये त्वक्षरमनिर्देश्यमव्यक्तं पर्युपासते ।
सर्वत्रगमचिन्त्यञ्च कूटस्थमचलन्ध्रुवम् ॥

सन्नियम्येन्द्रियग्रामं सर्वत्र समबुद्धयः ।
ते प्राप्नुवन्ति मामेव सर्वभूतहिते रताः ॥

क्लेशोऽधिकतरस्तेषामव्यक्तासक्तचेतसाम् ।
अव्यक्ता हि गतिर्दुःखं देहवद्भिरवाप्यते ॥

ये तु सर्वाणि कर्माणि मयि संन्यस्य मत्पराः ।
अनन्येनैव योगेन मां ध्यायन्त उपासते ॥

तेषामहं समुद्धर्ता मृत्युसंसारसागरात् ।
भवामि नचिरात्पार्थ मय्यावेशितचेतसाम् ॥

मय्येव मन आधत्स्व मयि बुद्धिं निवेशय ।
निवसिष्यसि मय्येव अत ऊर्ध्वं न संशयः ॥

अथ चित्तं समाधातुं न शक्नोषि मयि स्थिरम् ।
अभ्यासयोगेन ततो मामिच्छाप्तुं धनञ्जय ॥

अभ्यासेऽप्यसमर्थोऽसि मत्कर्मपरमो भव ।
मदर्थमपि कर्माणि कुर्वन्सिद्धिमवाप्स्यसि ॥

अथैतदप्यशक्तोऽसि कर्तुं मद्योगमाश्रितः ।
सर्वकर्मफलत्यागं ततः कुरु यतात्मवान् ॥

श्रेयो हि ज्ञानमभ्यासाज्ज्ञानाद्ध्यानं विशिष्यते ।
ध्यानात्कर्मफलत्यागस्त्यागाच्छान्तिरनन्तरम् ॥

अद्वेष्टा सर्वभूतानां मैत्रः करुण एव च ।
निर्ममो निरहङ्कारः समदुःखसुखः क्षमी ॥

सन्तुष्टः सततं योगी यतात्मा दृढनिश्चयः ।
मय्यर्पितमनोबुद्धिर्यो मद्भक्तः स मे प्रियः ॥

यस्मान्नोद्विजते लोको लोकान्नोद्विजते च यः ।
हर्षामर्षभयोद्वेगैर्मुक्तो यः स च मे प्रियः ॥

अनपेक्षः शुचिर्दक्ष उदासीनो गतव्यथः ।
सर्वारम्भपरित्यागी यो मद्भक्तः स मे प्रियः ॥

यो न हृष्यति न द्वेष्टि न शोचति न काङ्क्षति ।
शुभाशुभपरित्यागी भक्तिमान्यः स मे प्रियः ॥

समः शत्रौ च मित्रे च तथा मानापमानयोः ।
शीतोष्णसुखदुःखेषु समः सङ्गविवर्जितः ॥

तुल्यनिन्दास्तुतिर्मौनी सन्तुष्टो येन केनचित् ।
अनिकेतः स्थिरमतिर्भक्तिमान्मे प्रियो नरः ॥

ये तु धर्म्यामृतमिदं यथोक्तं पर्युपासते ।
श्रद्दधाना मत्परमा भक्तास्तेऽतीव मे प्रियाः ॥

ॐ तत्सदिति श्रीमद्भगवद्गीतोपनिषत्सु
ब्रह्मविद्यायां योगशास्त्रे श्रीकृष्णार्जुनसंवादे
भक्तियोगो नाम द्वादशोऽध्यायः ॥

atha dvaadasho'dhyaayah' .
bhaktiyogah' .

arjuna uvaacha -

evam' satatayuktaa ye bhaktaastvaam' paryupaasate .
ye chaapyaksharamavyaktam' teshaam' ke yogavittamaah' ..

shreebhagavaanuvaacha -

mayyaaveshya mano ye maam' nityayuktaa upaasate .
shraddhayaa parayopetaah' te me yuktatamaa mataah' ..

ye tvaksharamanirdeshyamavyaktam' paryupaasate .
sarvatragamachintyancha koot'asthamachalandhruvam ..

sanniyamyendriyagraamam' sarvatra samabuddhayah' .
te praapnuvanti maameva sarvabhootahite rataah' ..

klesho'dhikatarasteshaamavyaktaasaktachetasaam .
avyaktaa hi gatirduh'kham' dehavadbhiravaapyate ..

ye tu sarvaani karmaani mayi sam'nyasya matparaah' .
ananyenaiva yogena maam' dhyaayanta upaasate ..

teshaamaham' samuddhartaa mri'tyusam'saarasaagaraat .
bhavaami nachiraatpaartha mayyaaveshitachetasaam ..

mayyeva mana aadhatsva mayi buddhim' niveshaya .
nivasishyasi mayyeva ata oordhvam' na sam'shayah' ..

atha chittam' samaadhaatum' na shaknoshi mayi sthiram .
abhyaasayogena tato maamichchhaaptum' dhananjaya ..

abhyaase'pyasamartho'si matkarmaparamo bhava .
madarthamapi karmaani kurvansiddhimavaapsyasi ..

athaitadapyashakto'si kartum' madyogamaashritah' .
sarvakarmaphalatyaagam' tatah' kuru yataatmavaan ..

shreyo hi jnyaanamabhyaasaajjnyaanaaddhyaanam' vishishyate .
dhyaanaatkarmaphalatyaagastyaagaachchhaantiranantaram ..

advesht'aa sarvabhootaanaam' maitrah' karuna eva cha .
nirmamo nirahankaarah' samaduh'khasukhah' kshamee ..

santusht'ah' satatam' yogee yataatmaa dri'd'hanishchayah' .
mayyarpitamanobuddhiryo madbhaktah' sa me priyah' ..

yasmaannodvijate loko lokaannodvijate cha yah' .
harshaamarshabhayodvegairmukto yah' sa cha me priyah' ..

anapekshah' shuchirdaksha udaaseeno gatavyathah' .
sarvaarambhaparityaagee yo madbhaktah' sa me priyah' ..

yo na hri'shyati na dvesht'i na shochati na kaankshati .
shubhaashubhaparityaagee bhaktimaanyah' sa me priyah' ..

samah' shatrau cha mitre cha tathaa maanaapamaanayoh' .
sheetoshnasukhaduh'kheshu samah' sangavivarjitah' ..

tulyanindaastutirmaunee santusht'o yena kenachit .
aniketah' sthiramatirbhaktimaanme priyo narah' ..

ye tu dharmyaamri'tamidam' yathoktam' paryupaasate .
shraddadhaanaa matparamaa bhaktaaste'teeva me priyaah' ..

om tatsaditi shreemadbhagavadgeetopanishatsu
brahmavidyaayaam' yogashaastre shreekri'shnaarjunasam'vaade
bhaktiyogo naama dvaadasho'dhyaayah' ..

Ramaswamy Sastry and Vighnesh Ghanapaathi

Other stotras